Ibqa’ viġilanti online: tidentifika l-manipulazzjoni tal-informazzjoni?

Tagħraf sit web leġittimu minn klonu? 

Taf meta l-immaġnijiet, l-awdjo jew il-vidjo jkunu ġenwini u meta jkunu ‘‘deepfakes’’?  Il-manipulazzjoni tal-informazzjoni toħloq theddida serja għad-demokrazija tagħna u ddgħajjef is-sens ta’ komunità tagħna. Il-Kummissjoni qed tieħu azzjoni u taħdem mill-qrib ma’ istituzzjonijiet oħra tal-UE u l-istati membri biex tindirizza l-manipulazzjoni tal-informazzjoni. Hija żviluppat diversi riżorsi biex jgħinu liċ-ċittadini jinnavigaw b’mod sikur ix-xenarju online u jidentifikaw b’mod aktar faċli l-manipulazzjoni tal-informazzjoni. Xi eżempji tal-azzjonijiet tal-Kummissjoni biex tipproteġi s-soċjetà tagħna mill-manipulazzjoni tal-informazzjoni jinkludu:  

• Iż-żieda tar-responsabbiltà ta’ pjattaforma online biex jiżguraw li jieħdu passi proattivi biex jindirizzaw riskji sistemiċi minħabba informazzjoni falza jew qarrieqa, filwaqt li jiżguraw ambjent diġitali aktar sikur u aktar affidabbli għal kulħadd.
• Il-protezzjoni u l-appoġġ tal-ġurnalisti u l-media indipendenti, għaliex il-libertà tal-media u l-pluraliżmu tal-media huma essenzjali għad-demokraziji tagħna.
• Il-kooperazzjoni mal-verifikaturi tal-fatti, is-soċjetà ċivili, il-media u l-akkademja, u l-appoġġ għal proġetti li jikkontribwixxu għall-ġlieda kontra l-manipulazzjoni tal-informazzjoni u l-interferenza barranija, għaliex flimkien inkunu aktar b’saħħitna.

Il-fehim ta’ strateġiji tal-manipulazzjoni tal-informazzjoni jagħti s-setgħa lin-nies jirrikonoxxuhom u jirreżistihom. Ir-riżorsi f’din il-paġna jistgħu jgħinuk tiżviluppa l-ħiliet tiegħek ta’ ħsieb kritiku. Ipproteġi lilek innifsek mill-manipulazzjoni tal-informazzjoni.