Fl-Unjoni Ewropea, bejn 13 u 29% tal-istudenti ta’ 15-il sena jirrapportaw li spiss isofru bullying. 20% tat-tfal fl-Ewropa jsofru xi forma ta’ abbuż sesswali matul it-tfulija tagħhom, u s-suwiċidju hu t-tieni kawża tal-mewt fost dawk bejn il-15 u d-19-il sena.
Fid-dawl ta’ din is-sitwazzjoni, fit-23 ta’ April 2024 il-Kummissjoni Ewropea adottat Rakkomandazzjoni dwar l-iżvilupp u t-tisħiħ tas-sistemi integrati għall-protezzjoni tat-tfal li tiffoka b’mod partikolari fuq il-ħtieġa li jiddaħħlu mekkaniżmi fil-livelli nazzjonali, reġjonali u lokali biex it-tfal ikunu jistgħu jesprimu l-fehmiet tagħhom liberament u jkunu involuti fil-valutazzjoni tal-istrateġiji, il-politiki u s-servizzi tal-protezzjoni tat-tfal.
L-iskejjel u l-għalliema jistgħu jaħdmu fuq il-prevenzjoni billi jħeġġu lit-tfal jagħtu aktar attenzjoni lis-sikurezza tagħhom online u offline. Din il-ħidma tinkludi, ngħidu aħna, li t-tfal jiġu infurmati dwar il-perikli online ħalli jiġu promossi l-użu sikur tat-teknoloġiji diġitali, il-protezzjoni tas-saħħa mentali tagħhom, u l-prevenzjoni u l-ġlieda kontra l-bullying, anki dak fuq l-internet.
Agħti ħarsa lejn il-verżjoni tar-Rakkomandazzjoni adattata għat-tfal. Din il-verżjoni, miktuba miż-żgħażagħ, tista’ tintuża biex l-istudenti jingħataw informazzjoni fuq id-drittijiet tagħhom u fuq il-protezzjoni tat-tfal fl-UE u madwar id-dinja, u biex issir diskussjoni fuq kif jistgħu jittejbu dawn iż-żewġ aspetti.
Dettalji
- Data tal-pubblikazzjoni
- 17 Ottubru 2024
- Awtur
- Id-Direttorat Ġenerali għall-Komunikazzjoni