Iltaqgħu ma’ Helena, Klaus, Kasia, Enzo u Marion – l-“ESPLORATURI DIĠITALI” tagħna waqt vjaġġ madwar l-Ewropa biex taraw il-progress tad-diġitalizzazzjoni.

Id-diġital jiftaħ dinja ta’ possibilitajiet: titilfux iċ-ċans biex titgħallmu dwar l-aktar suġġetti eċċitanti inklużi l-intelliġenza artifiċjali, id-data jew is-superkompjuters, u siru afu kif dan kollu qed irawwem il-futur diġitali tal-Ewropa – il-futur TIEGĦEK.

Xi jfisser li pajjiż ikun fost il-mexxejja globali tad-diġitalizzazzjoni? Kif nistgħu nkejlu d-diġitalizzazzjoni? X’inhi l-konnettività, il-kapital uman jew is-servizzi pubbliċi diġitali? Araw dan l-episodju u siru esperti ta’ dawn il-kunċetti biex tkunu tistgħu ssiru “ESPLORATURI DIĠITALI” f’pajjiżkom stess.

Qatt esperjenzajtu problema bil-konnessjoni? Qatt użajtu hot spot tal-Wi-Fi bla ħlas? Smajtu bil-5G? Dan l-episodju se jispjega għaliex huwa importanti li lkoll kemm aħna nkunu konnessi u kif nistgħu ntejbuha.

Kont taf li tista’ tiskrollja, tikkondividi, tibgħat messaġġi u ċċempel fi kwalunkwe post fl-UE - mingħajr ebda ħlas?! Il-biża’ ta’ kontijiet tat-telefon għoljin hija biss tħassib tal-passat. Mill-2017 ’l hawn, tista’ tivvjaġġa madwar l-UE u tibqa’ f’kuntatt mal-familja u mal-ħbieb. Iċċekkja kif l-esploraturi diġitali tagħna qed jagħmlu l-aħjar użu minn benefiċċji bħal “Roam like at home” fl-avventuri tagħhom madwar l-UE!

Kontu tafu li d-data tinsab kullimkien? Mhux hekk biss: qed tbiddel ukoll il-mod kif jaħdmu l-affarijiet. Araw dan l-episodju tal-ESPLORATURI DIĠITALI biex issiru tafu kif id-data tivvjaġġa madwar l-Unjoni Ewropea u kif tista’ ttejbilna ħajjitna.

Kontu tafu li anke jekk ma tistgħux tarawha, l-ammont tad-data kollha miġbura fid-dinja se tikber għal 175 zettabytes fl-2025, li huwa biżżejjed biex tivvjaġġaw lejn il-qamar u lura ħames darbiet? Araw dan l-episodju tal-ESPLORATURI DIĠITALI biex tifhmu s-superkompjuters u tibdew taħsbu kbir, ENORMI.

Qatt rajtu robot? Kontu tafu li l-ismartphone wkoll juża l-intelliġenza artifiċjali? Araw dan l-episodju tal-ESPLORATURI DIĠITALI biex issiru tafu kif tiżguraw li tistgħ tafdaw l-IA, li sservi lilna – in-nies, u tirrispetta l-valuri tagħna.

It-teknoloġija kwantistika mhijiex biss għal dawk li jħobbu l-fiżika! Ħalli lill-ESPLORATURI DIĠITALI tagħna jeħduk fuq vjaġġ affaxxinanti biex tifhem xi jfisser u kif dan jaffettwa l-ħajja tagħna ta’ kuljum hawnhekk fl-Ewropa. Barra minn hekk, jekk smajt bl-esperiment tal-ħsieb “Schrödinger’s cat”, tassew se tieħu pjaċir bl-ispjegazzjoni viżwali tagħna.

Karti? Xi ħaġa tal-passat! Kont taf li l-identità Diġitali Ewropea l-ġdida tista’ tissimplifika b’mod sikur il-mod kif nikkondividu ċertifikati importanti, nirrapportaw tibdil fl-indirizz, nagħtu prova tal-età tagħna jew saħansitra kif nimlew d-dikjarazzjoni tat-taxxa tagħna? L-ESPLORATURI DIĠITALI tagħna jispjegaw pass pass il-ħafna benefiċċji – dan kollu biss permezz ta’ ftit klikks.

“Pass żgħir għal raġel, qabża kbira għall-umanità” – matul ħames deċennji minn dan l-istadju enormi fl-esplorazzjoni tal-ispazju, issa nafu ħafna aktar dwar dak li hemm madwarna bis-saħħa tat-teknoloġija innovattiva. L-ESPLORATURI DIĠITALI tagħna jagħtu ħarsa aktar mill-qrib lejn l-infrastruttura spazjali Ewropea (Copernicus ifakkrek f’xi ħaġa?) u l-vantaġġi li toffri lill-umanità u lill-moħħ kurjuż.

X’inhi s-sensibilizzazzjoni dwar iċ-ċibersigurtà? X’riskji qed inħabbtu wiċċna magħhom online? Kemm aħna konxji tat-theddid online u kif għandhom jiġu ġestiti? L-ESPLORATURI DIĠITALI tagħna se jagħtuk xi poteri kbar għaliex aħna lkoll jeħtieġ li nsaħħu l-ħiliet ċibernetiċi tagħna biex nibqgħu sikuri. Se tiskopri kif il-ġenerożità, l-għarfien, il-ħiliet soċjali, iċ-ċavetta maġika, il-ger tar-rivers u s-saħħa kollha għandhom rwol speċjali online. U dejjem ftakar biex Taħseb Qabel Tikklikkja!